دانیار
پێچەوانەی ئەو لێکدانەوانەی لەسەر خەباتی حیزبی دێموکڕات لە دوو دەیەی ڕابردوودا دەکران و پێشمەرگە و خەڵکیان بە لێکدابڕاو لە یەکتر پێناسە دەکرد، لە ڕاستیدا پێشمەرگە و خەڵک لێكدانەبڕابوون بەڵكوو شێوەی خەبات گۆڕانی تێدا پێکهاتبوو. بەو مانایە كە لە جیاتی خەباتی بەرگریی چەكدارانە لەسەر بەهێزكردنی تەشكیلاتی ڕێكخراوەیی و پەروەردە و بارهێنانی ئەندامان و بەنێونەتەوەیی كردنی زیاتری پرسی كورد لەنێو كۆمەڵگەی ڕۆژئاواییدا كاری دەكرد.
ڕاستە حوزووری فیزیكیی پێشمەرگە وەک پێشتر نەبوو بەڵام سیاسەت و ڕێبازی فكری حیزب لەسەر دەستی ئەندامانی نێوخۆ و لەژێر ڕێنوێنیی ڕێبەرایەتی حیزبی دێموكرات بەردەوام لەنێو خەڵکی كوردستاندا شەپۆلی دەدا تا ئەوەی ڕاسان لەدایك بوو.
ئەوەش بەو مانایە دێت کە هێزە بنگەییەکەی ڕاسان خەڵکی ڕۆژهەڵاتە و هێزی پێشمەرگەی کوردستانیش ورەبەخش و پشتیوانی خەڵکی ڕۆژهەڵاتە. ئەو قۆناغە نوێیە لە خەبات کە ئامانجی لێکگرێدانی خەباتی شار و خەباتی شاخە، زۆر ڕەهەندی هەیە و بەرچاوترینیان ڕەنگە هەمان نوێکردنەوەی دیداری پێشمەرگە و خەڵکی ڕۆژهەڵات بێت کە پێشوازیی گەرمی خەڵک ئەو ڕاستییەی سەلماند.
بەڵام گرنگیی ڕاسان لە ئێستادا کە دەبێ چی بێت یان بەگشتی ئەرکی هێزێکی سیاسی- نەتەوەیی و مافویست و ئازادیخواز و دێموکرات وەک حیزبی دێموکرات لە ئێستادا چییە، دەگەڕێتەوە بۆ زۆر فاکتەری ناوچەیی و جیهانییەوە و پەیوەستە بە هەلومەرجی نێوخۆیی کوردستان و ئێرانەوە. لە سیستەمە دیکتاتۆر و تۆتالیتێرەکاندا، جووڵانەوە ناڕازی و بزووتنەوە مەدەنییەکان زەحمەتە ببنە هێزی جێگرەوەی ڕێژیم هەرچەندە زەمینەکان بۆ ڕاپەڕینی سەرتاسەریش فەراهەم بکەن. جا ئەگەر ئەو سیستەمە ڕەفتار داگیرکەر و فاشیستیش بێت و خاکی کوردستان بە هی خۆی بزانێت ئەوا خەباتی شار و تەوژمی شەقام ئەگەر بەهێزیش بێت بەرگەی سەرکوتی ڕێژیم ناگرێت. لێرەدایە کە دەبێ هاوتەریبی شار کە زەمینەی سەرهەڵدان و ڕێکخستنی شەقام فەراهەم دەکات، پێویستە کە خەباتێک لە شاخ وەک هێزی پاڵنەری خەڵک و ڕاماڵینەری ڕێژیمی ڕەفتار داگیرکەر حوزووری هەبێت. ئەو هێزە لە شاخ بە هەڵسەنگاندن بۆ دۆخی ناوچەیی و فاکتەرە دەرەکییەکانی دیکە بە هەستیارییەوە دەبێ هەنگاو بنێ و بە کەمترین زیان لەو هاوکێشەیەدا بتوانێ بەرژەوەندی و سەرکەوتنی گەورە بۆ کوردستان بێنێتە بەرهەم.
گرنگییەكانی ڕاسان:
– بەهێزكردنی ڕۆحییەی بەرگری و ئیرادەی خۆڕاگری بۆ بەگژداچوونەوەی ڕێژیمی ڕەفتار داگیركەر.
– لەخۆگرتن و ڕێكخستنی لاوانی كوردستان لە ڕیزی هێزی پێشمەرگەی كوردستاندا بۆ درێژەدان بە خەبات و لە هەمان کاتیشدا تا لە داوی ڕێژیم و هێزە بناژۆخوازەكان بەدوور بن و ڕاكێشی ئەوێ نەكرێن.
– دۆخی شڵەژاو و ئاڵۆزی ناوچە كە دەوری كوردستانی تەنیوە ئەوە دەخوازێ كە هێزێكی بە پرەنسیپی باوەڕمەند بە دێموكراسی و مافەكانی مرۆڤ بتوانێ پارێزگاری لە موڵكی گشتی و سامانی خەڵکی كوردستان بكات لە ئەگەری سەرهەڵدان و ڕووخانی ڕێژیمدا.
– لە ئاستی نێونەتەوەییدا ڕاسان سەرنجی كۆمەڵگەی ڕۆژئاوایی بۆ لای خۆی ڕاكێشایەوە و پرسی كوردی خستەوە ڕۆژەڤ.
– كورد لە باشووری كوردستان داوای سەربەخۆیی بەرز كردەوە كە لەلایەن وڵاتی عێراق و دراوسێیەکانەوە بە توندوتیژی وەڵام درایەوە و ڕێفراندۆم سڕ کرا، سیستەمی خۆبەڕێوەبەری لە ڕۆژئاوای كوردستان هاتە كایەوە كە لەشكركێشیی توركیەی بەدوادا هات و باكووری كوردستانیش دەرەنجامی پرۆسەی ئاشتی شكستی هێنا، كوردەكان دیسان خەباتی شاخیان هەڵبژاردەوە، ئەوەش پێمان دەڵێ دەوڵەتانی ڕەفتارداگیركەری كوردستان بەهیچ شێوەیەك لەگەڵ خواست و داوا ڕەواكانی گەلی كورد بەشێوەی مەدەنییانە نییە بەڵكوو هەوڵی سڕینەوەی دەدا و مافی بەشداریی سیاسی و هاوبەشی لە دەسەڵاتی وڵاتدا پێ ڕەوا نابینێت. کوردستانی ڕۆژهەڵات تەنانەت لە کاتی نەبوونی خەباتی چەكداریشدا زیاتر میلیتاریزە كرا و لە خەڵكانی خۆجێیی هێزگەلی نیزامی و ئەمنییەتی جۆربەجۆریان لە ڕاستای خزمەت بە ڕێژیمی ئاخوندیدا دروست كرد كە كوردستانی كردبووە سەربازگەیەكی گەورە.
– لە دوو دەیەی ڕابردوودا ڕێژیمی ئاخوندی هیچ چەشنە كرانەوەیەكی بەڕووی ئازادی و مافە سیاسییەكانی گەلانی ژێر دەسەڵاتی “ئێرانـ”ـەوە بەخۆیەوە نەبینی و بەڵكوو تەنانەت بزووتنەوەی لایەنەکانی نزیك لە خۆشی لە ئێران لەگەڵ سەركوت و توندوتیژی بەرەوڕوو كردەوە.
– لە كوردستانیش زۆرینەی ناوەندە فەرهەنگی و ئەدەبییە كوردییەكان یان داخران یان سنووردار كران و چالاكوانانی مەدەنی و ژینگەپارێزان كەوتنە زیندانەكانەوە و هەڵبژاردنی مەجلیسیش هەر لە خزمەتی سیاسەتەكانی ڕێژیمدا بەڕێوە دەچوو و ئێستاش هەر بەم شێوەیەیە.
سەرچاوە: کوردستان مێدیا
