ڕێکخستنی گشتیی حیزبی دێموکرات لە دەرەوەی وڵات بەبۆنەی ٢٥ی گەلاوێژ، ٧٥ـەمین ساڵیادی دامەزرانی حیزبی دێموکراتی کوردستانی ئێران پەیامێکی پیرۆزبایی بڵاو کردوە.
دەقی پەیامەکە بەم چەشنەیە:
کۆمەڵانی ئازادیخواز و شۆڕشگێڕی کوردستان
هۆگران و ئەویندارانی ڕێبازی دێموکرات
ئەندام و لایەنگرانی حیزبی دێموکرات
بنەماڵەی سەربەرزی شەهیدان
زیندانییانی سەربەرز و خۆڕاگری سیاسی
٧٥ ساڵ لەمەوبەر بەپێی زەروورەتێکی سیاسی و بە پاشخانێکی مێژوویی و لەسەر بناغەی کۆمەڵەی ژیانەوەی کوردستان (ژ-ک)، بە مەبەستی ڕێکخستنی خەباتی نەتەوەی کورد و لە هەلومەرجی سیاسیی نوێی ناوچەکەدا و لەسەر دەستی نەمر پێشەوا ”قازی محەممەد”، حیزبی دێموکرات، حیزبی خۆشەویستی كۆمەڵانی خەڵكی كوردستان و ئەستێرەی پڕشنگداری جووڵانەوەی میللی – دێموكراتیكی گەلی كورد لە خۆرهەڵاتی کوردستان دامەزرا و لە ٢٥ی گەلاوێژی ئەمساڵ، ٧٥ ساڵ لە تەمەنی پڕ لە شانازی و سەروەریی خۆی تێپەڕ دەکات و یووبیلی ئەڵماس لە بەرۆکی خۆی دەدات.
بە دامەزرانی حیزبی دێموکرات، کورد و تەڤگەری ڕزگاریخوازیی نەتەوەکەمان پێیان نایە قۆناغێکی نوێ لە خەباتێکی مۆدێڕن و سەردەمیانە و خاوەن بەرنامەیەکی سیاسی و پێشکەوتنخوازانە.
حیزبی دێموکرات بە درێژایی ژیانی سیاسی و قۆناغە سەختەکانی خەبات و تێکۆشانی لە ماوەی ٧٥ ساڵی ڕابردوودا بۆ ساتێکیش بێت لە چالاکی و خەبات سڵی نەکردووەتەوە و دێڕ بە دێڕی مێژووی تێکۆشانی حیزبەکەمان لە وەرزە زێڕینەکانی خەباتدا تۆمار کراوە و ڕۆژ لە دوای ڕۆژ هەنگاوەکانی لەپێناو ئاشتی و ئازادی و وەدیهێنانی مافە نەتەوەییەکانی گەلی کورددا پتەوتر کردووە.
بەم بۆنە پیرۆزەوە بە ناوی ڕێکخستنی گشتیی حیزبی دێموکرات لە دەرەوەی وڵات پیرۆزبایی لە هەموو ئازادیخوازان بەگشتی و کۆمەڵانی خەڵکی کوردستان، بنەماڵەی سەربەرزی شەهیدان، زیندانییانی خۆڕاگری سیاسی، کادر و پێشمەرگە قارەمانەکان و ئەندامان و لایەنگرانی حیزبی دێموکرات بەتایبەتی دەکەین و هەروەها لە ئاستی گیانی هەموو ئەو شەهید و نەمرانەی کە لە ڕێگای خزمەت بە ئامانجەکانی حیزبی دێموکرات و لە ڕەوتی بەرگری لە ماف و ئازادییەکانی نەتەوەکەماندا سەریان نایەوە و گیانیان فیدای بەختەوەریی نەتەوەکەیان کرد سەری ڕێز دادەنەوێنین.
گەلاوێژ، خاڵی گەشانەوەی هیواکان لە هەموو خەڵکی ئازادیخواز و مافویستی کوردستان پیرۆز و هیواتان بەرزتر بێت.
ڕێکخستنی گشتیی حیزبی دێموکراتی کوردستانی ئێران لە دەروەوەی وڵات
٢٥ی گەڵاوێژی ١٣٩٩ی هەتاوی
