ڕۆژی شەممە ڕێکەوتی ٢١ی مای ٢٠٢٢ی زایینی بە بۆنەی ٣١ ـەمین ساڵوەگەڕی دامەزرانی پارتی ئازادی کوردستان ڕێوڕەسمێک لە لایەن پارتی ناوبراوەوە لە شاری بێمل بە بەشداری کۆمەڵێک لە کوردانی دانیشتووی ئەو وڵاتە و نوێنەرانی حیزبە سیاسییەکان بەڕێوەچوو. لەو ڕێوڕەسمەدا لەسەر بانگهێشتی فەرمی پارتی ئازادی هەیئەتێکی کۆمیتەی حیزبی دێموکراتی کوردستانی ئێران بە سەرپەرستی کاک پەرویز ئەمین‌عەشایری بەشدار بوون. بەڕێزیان وێڕای پیرۆزبایی ساڵوەگەڕی پارتی ئازادی کوردستان باسێکی لەسەر هەلومەرجی ئێستای پێوەندیدار لە ناوچە بە گشتی و کوردستان بە تایبەتی پێشکەش کرد کە چۆن خەڵکی وەزاڵەهاتووی ئێران لە ئاست سەرکووت و گرانیی دەستیان بە خۆپێشاندان کردووە و دەسەڵاتدارانیان ئیدانە کرد و وێنەی ڕێبەرانیان دەسووتێنن و درووشمی دژی ڕژیم و ڕووخانی دەدەن. هەروەها ئاماژەی بەوە کرد کە ڕژیم لە پەلەقاژەی سەرەمەرگدایە ویەکێتی ناو ماڵی کورد لەو بەشە دەبێتە زامنی سەرکەوتن و بەپێکهاتنی ئوپۆزیسیۆنێکی ڕێکخراوی سەراسەری دەتوانرێت ئاواتی هەموو ئازادیخوازێک بێتە دی. لە کۆتاییدا وێڕای هاودەردی لەگەڵ بنەماڵەی شەهیدانی خۆپێشاندانەکە هیوای ئەوەی خواست کە کۆمەڵگای نێودەوڵەتیش بێدەنگ نەبێت.
