رۆژی هەینی رێکەوتی 29-01-2021 شاندێك بە نوێنەرایەتی حیزبی دێموکڕاتی کوردستانی ئێران لە وڵاتی سوئێد كه پێکهاتبوو لە هاوڕێیان چیا عەلیار و عەباس یاری بەشداری ڕێوڕەسمی خاکسپاردنی تێکۆشەری دیرێنی گەلەکەمان ئیحسان بیچیملی بوون کە لە شاری ستۆکهۆڵم کۆچی دوایی کرد.
ئیحسان بیچیملی خەڵکی باکوری کوردستان بوو کە ساڵی 1980 پاش شۆڕشی گەلانی ئێران و خەباتی ڕزگاریخوازی حیزبی دێموکراتی کوردستانی ئێران لە وڵاتی سوئێده‌وه گەڕاوە ڕۆژهەڵاتی کوردستان و لە ڕیزی خەباتکارانی حیزبەکەماندا وێڕای زۆربەی تێکۆشەرانی پارتى سوسیالیستی باکوری کوردستان وەک پێشمەرگە ئەرکی پیرۆزی خەباتی ڕزگاری کوردستانی له‌شان گرت.
پاش چەند ساڵ لە سەر داوای حیزبی دێموکڕات گەڕاوە وڵاتی سوئێد و لای بنەماڵەکەی و له دەرەوەی وڵاتیش ناوبراو هەمیشە دۆستێکی بە وەفا و دڵسۆزی حیزبی دێموکرات بوو.
لە رێوڕەسمى خاكسپاریدا پەیامی هاوخەمیی کۆمیتەی سوئێدی حیزبی دێموکرات خوێندراوە و شاندى حیزب پرسە و هاوخەمیان گه‌یانده بنەماڵەی ناوبراو و سۆزى حیزبی دێموکراتیان بۆ بنەماڵەکە دووپات كرده‌وه.
