دارا ناتق، چاڤدێرەكێ سیاسی یێ رۆژهەلاتێ كوردستانێ دیار دكەت كو ب هاتنا جۆ بایدن دێ پرسا كوردی كەفتە قۆناغەكا نوو، ل هەرێما كوردستانی دێ پێگەهێ كوردان ب هێز كەڤیت و ل رۆژئاڤایێ كوردستانێ ژی، بێگومان ئەو یەك ب دلێ ئیرانێ نینە و ئیرانێ دڤێت ئاستەنگیان ل هەمبەر ستراتیژیا ئەمریكا ل دۆر كوردان دروست بكەت.
چاڤدێرەكێ سیاسی یێ رۆژهەلاتێ كوردستانێ كو بەری نها ئەندامێ سەركردایەتیا پارتی دیموكراتی كوردستان/ ئیران بوویە د دیدارەكا تایبەت دا بۆ ئەڤرۆ دیار كر كو ئیدارا نوو یا ئەمریكا ب سەرۆكاتیا جۆ بایدن دڤێت گرنگیەكا مەزن بدەتە پرسا كوردی، ئەو یەك ژی دێ بیتە ئەگەرێ هندێ كو پێگەهێ كوردان ل هەرێما كوردستانێ ب هێز كەڤیت، هەرێما كوردستانێ جهەكێ هەری ئارامە بۆ ئەمریكا و هەڤپەیمانێن وێ و ژ بەر هندێ ژی ئیران دترسیت كو گرنگیدانا ئەمریكا بۆ كوردان ببیتە ئەگەرێ هندێ كو رەوشا ناڤخوەیی یا ئیرانێ ژی ئالۆز ببیت و گۆت: (د ماوەیێ دو حەفتیێن بۆری دا پتر ژ سەد چالاكڤانێن سیاسی یێن كورد ل رۆژهەلاتێ كوردستانێ هاتینە دەستەسەر كرن، ئەو یەك ژی نیشا ددەت كو ئیرانێ دەست ب پیلانەكا نوو ل دژی كوردان كریە، هێرشێن ل سەر سەرۆك بارزانی و پێشمەرگێن كوردستانێ ژی پشكەكن ژ ستراتیژیا نوو یا كۆمارا ئیسلامی ل دژی كوردان، چونكو ئیرانێ نەڤێت كورد پێگەهێ خوە ب هێز بكەن و نها ب هەموو رەنگەكێ كار بۆ لاوازكرنا كوردان دكەن، ئیران هێزێن شیعە ژی ل دژی هەرێما كوردستانێ بكار دئینیت دا هەولێر و بەغدا نەگەهنە چو رێككەفتنان).
دارا ناتق ئەو یەك ژی دیار كر كو نها رەوشا ناڤخوەیی یا ئیرانێ گەلەك خرابە و بەرپرسێن ئیرانێ وەسا هزر دكرن هەكە جۆ بایدن ببیتە سەرۆكێ ئەمریكا دێ سزایێن ل سەر ئیرانێ راكەت و دێ رێككەفتنا ئەتۆمی ژی كارا كەت لێ رەوش وەسا نینە و بایدن ب چو رەنگەكێ رێ نادەت كو جارەكا دی ئیران ل دەڤەرێ ب هێز كەڤیت و هەر دانوستاندنەك ژی د ناڤبەرا ئەمریكا و ئیرانێ دا بهێتە كرن دێ بۆ ئیرانێ یا خراب بیت، چونكو بایدنی دڤێت سزایێن ل سەر ئیرانێ گرانتر ژی بكەت و ڤێجارێ دێ هەڤپەیمانێن ئەمریكا ژی دەست ب سزادانا ئیرانێ كەن و گۆت: (بایدن دێ ب رێیا دانوستاندنان و ب ئاڤاكرنا بەرەیەكێ ل گەل ئیسرائیلێ و هەڤپەیمانێن خوە سزایێن گرانتر ژی ل سەر ئیرانێ سەپینیت و ژ بەر هندێ ژی رەوشا ناڤخوەیی یا ئیرانێ دێ خرابتر لێ هێت، بەرپرسێن ئیرانێ وەسا دبینن هەكە رەوش خرابتر ببیت و خەلك دەست ب خوەنیشادانان بكەن دێ كورد ب هێز كەڤن و ژ بەر هندێ ژی دەمەكە دەست ب دەستەسەركرنا چالاكڤانێن كورد كرینە و لاوێن كورد ل سێدارە ددەن دا خەلكی چاڤترسی بكەن).
ناڤهاتی د دووماهیا ئاخڤتنا خوە دا ئەو یەك ژی نەڤەشارت كو هەرێما كوردستانێ بوویە جهەكێ گرنگ بۆ پرسا كوردی ل هەموو پارچێن دی یێن كوردستانێ و وەسا دیارە ئیدارا جۆ بایدن دێ گرنگیەكا تایبەت دەتە پرسا كوردی، بێگومان رژێما ئیرانێ ژ هندێ دترسیت و دڤێت ئالۆزیان دروست بكەت، ئیرانێ دڤێت ئارامیا ل هەرێما كوردستانێ تێك بدەت دا ئەمریكا نەچار بیت هەلویستێ خوە ل هەمبەر ئیرانێ نەرم بكەت، ئیرانێ دڤێت فشارێن خوە ل سەر هەڤپەیمانێن ئەمریكا ل دەڤەرێ زێدەتر بكەت و هێرشێن ڤێ دووماهیێ ل سەر كوردان و سەركردایەتیا كورد ب تایبەتی ژی جەنابێ سەرۆك بارزانی پشكەكە ژ ڤێ ستراتیژیا ئیرانێ.
(ئەڤ دیدار، ژ ئالیێ “هۆشەنگ تاجر” هاتیە ساز کرن و د رۆژنامەیا “ئەڤرۆ” ئا هەژمار ٢٨٩٨ ئان دە هاتیە بەلاو کرن. )
