هاوار بازيان / چالاكیی چەكداری بەردەوام بەشێك بووە لە خەباتی كورد بۆ ماف و ئازادی لە هەر پارچەیەكی كوردستان تەنانەت ئەگەر شەڕ خواستی كوردیش نەبووبێ ئەوە شەڕی بەسەردا سەپاوە و هەرچی شەهیدە لەسەر خاكی خۆی گیانی فیدا كردووە. دوژمنی كورد لەهەمووان زیاتر ئاشنایە بە ماف و رەوابوونی پرسی كورد لە هەر چوار وڵاتی داگیركار، بەڵام باشترین چارەسەرییان پێ ئەوەیە شەڕ بەدەوام بێ تا بتوانن لە پەنای باڵادەستیی هێزدا، مافی گەلێك بشێوێنن.
جووڵەی دووبارە و بەرچاوی كورد لە رۆژهەڵاتی كوردستان بەتایبەت لەڕووی چەكدارییەوە لەگەڵ ئەوەیدا تازە نییە، دەیان شەهید و خوێنی تازەی بە كاروانی درێژی شەهیدان بەخشیوە، بەڵام بێگومان لەڕووی كات و شێواز و قەبارەوە شایانی هەڵسەنگاندنە كە بەكوورتی لە چوار خاڵدا باسیان دەكەین:
1. كۆماری ئیسلامی ئەگەرچی لەناوەخۆدا ئاڵۆزە و ناڕەزایەتییەكی فرەوان لەڕووی ئابووری و ژیان و تەنانەت ناوەخۆی دەسەڵات و ئایدیۆلۆژییەوە ئەو رێژیمەی گرتووتەوە، بەڵام لەڕووی هێز و دەستوەردانی لە وڵاتانی دراوسێدا هێشتا باڵادەستە، بەجۆرێك كە دەسەڵاتی تاران لە گرەوی پیلانگێڕییە لە دیمەشق، بەغدا، بەیرووت، غەزە، كابول، هەولێر و تەنانەت ئەمەریكای لاتین و باشووری ئەفریقا و ناوەڕاستی ئوروپا! چالاكیی هێزە كوردییەكان بەتایبەت حیزبی دیموكراتی كوردستانی ئێران كە بنكە و بارەگاكانی لە هەرێمی كوردستانە، لە ئێستەدا ئەوپەڕی شۆڕشگێڕبوونی كوردە بۆ ئەوەی ئیرداەی خۆی لە بەرەنگاربوونەوەی دەسەڵاتێكی دواكەوتووی وەك كۆماری ئیسلامیدا پیشان بدا. پەیامی یەكەم هەمان خۆڕاگرییە.
شەڕێكی نابەرابەر كە تێیدا بەشەهیدبوونی ئازادیخوازی كورد بەردەوام دەبێ و پەیامی ئەو شەهیدانە لە هەمیشە زیاتر ئەوە دەسەلمێنێ كە كورد واز لە خەبات بۆ ئازادی ناهێنێ ئەگەر دوژمن سەت هێندە زیاتر دڕندە و سەرسەخت بێ.
2. كۆمەڵگەی كوردی رۆژهەڵات زیاتر لە 30 ساڵە دوورە لە هێزە كوردییەكان و ئەو دابڕانە جەستەیییە نەبووەتە هۆی دابڕانی كار و رێكخستنی هەڵوێستی هەردوولایەنی خەڵكی ناوشار و خەباتكاری دەرەوەی شار. واتە هێزێكی وەك حیزبی دیموكرات خوێندنەوەی روون و وردی بۆ نەوەی تازەی كورد لە رۆژهەڵات هەیە كە لە ماوەی ئەو 30 ساڵ تاراوگەنشینییەدا پێگەیشتووە، بەڵام هێشتا داوای ماف دەكا لە كاتێكدا كۆماری ئیسلامی لە تەمەنی 42 ساڵی پڕ لە جینایەتیدا دەیان و سەتان پلان و پیلانی بەكارهێناوە تا بۆ نموونە هەر لە قۆناخی یەكەمی خوێندن بتوانێ مێشكی منداڵی كورد بەتاڵ بكا لەوەی مرۆڤە و شایانی مافی مرۆڤـە؛ بێهۆشی بكا لەوەی كوردە و خاكەكەی كوردستانە؛ هەڵقوڵانی لاوانێكی شۆڕشگێڕ لەو فەزایەدا و تێكەڵبوونیان بە ریزی خەباتكاران و پێشمەرگەی ناوشار و دواتر شەهیدبوونیان بەرامبەر هەمان رێژیم، پەیامێكی روونە.
سەرنەكەوتنی رێژیمێكی وەك تاران لەو بوارەدا ئەوپەڕی سەركەوتنە بەتایبەت كە تەمەنی زۆرینەی شەهیدانی تازەی دیموكرات لە تەمەنی كۆماری ئیسلامیدایە و لە قووڵایی شەڕی ئایدیۆلۆژیی رێژیمەوە هەستیان بە “كورد و ئازادی” كردووە و بە سەربەرزی ئەو پیلانەی رێژیمیان پووچەڵ كردووەتەوە. پەیامی دووهەم ئەوەیە كورد واز لە مافەكانی ناهێنێ و هیچ پیلانێكی داگیركار بەرامبەر مافی نەتەوەیەكی وەك كورد سەرناگرێ.
3. لەئاستی ناوەخۆی ئێراندا، زەنگێكی ئاگادارییە بۆ ئەوەی هێز و لایەنەكانی تری لەوپەڕی راستەوە تا ئەوپەڕی چەپ لە ناوەخۆ و دەرەوەی ئێران لە هەر نەتەوەیەك، دڵنیابن لەوەی كورد چاوی لەدەست و مەچەكی خۆیەتی بۆ ئەوەی خەباتی خۆی پێش ببات. بەواتەیەكی تر كورد لە رۆژهەڵات چاوەڕێ نابێ بزانێ لە كۆبوونەوەكانی ویەن لەسەر پرسی ئەتۆمی چی روو دەدات یان كام وڵات چۆن و كەی هێرش دەكاتە سەر ئێران هەروەك چۆن چاوەڕێ نییە نەوەی تازەپێگەیشتووی دەسەڵاتی ئاخوندی لە بەرگی چاكسازیخواز و دەنگی بەڕواڵەت جیاوازدا گەوجاندن بە ئەقڵی سیاسیی كورد بكا. پەیامەكە ئەوەیە ئێمە پشتمان بە خوێنی لاوانی خۆمان بەستووە و تێگەیشتووین لەوەی ئازادبوونی كورد لە رۆژهەڵات بەر لە هەموو شت لە دەستی خۆیانە و هۆكانی تر رۆڵی لاوەكیان هەیە.
4. لە ئاستی كوردستانیدا، چالاكییە چەكدارییەكانی پێشمەرگەی دیموكرات لە ناوەخۆ كە بە راسان و راپەڕینی شۆڕشگیڕی ناسراوە، شكاندنی ئەم تەم و گومانە سیاسییە بوو كە گوایە سەركردایەتیی دیموكرات “ملكەچی” هەڕەشەی هێزەكانی تری وەك پارتی كرێكارانی كوردستان بووە لەوەی چالاكییەكانیان سنووردار بكەن یان ئەوەی لە چوارچێوەی سیاسەتی پارتی دیموكراتی كوردستان وەك “فشار” بەرامبەر كۆماری ئیسلامی كار دەكا. پەیامە گەورەكە ئەوەیە سەربەخۆیی و بوێریی دیموكرات لەو قۆناخەشدا ئەگەرچی بە خوێنی دەیان شەهیدی لاو و تازە جۆش كراوە، بەڵام سەربەرزییە بۆ ئەوەی دیموكرات هەر پێشەنگ بی و دەنگی رەسەنی خەباتی كورد لە رۆژهەڵاتدا بمێنێ.
