ڕۆژی چوارشەممە ڕێکەوتی ١٤ی بانەمەڕی ٢٧٢٢ی کوردی، کۆمیتەی حیزب لە وڵاتی بریتانیا لە شاری بێرمینگهام کۆبوونەوەیەکی ڕێکخراوەیی بۆ هەموو ئەندامانی حیزب لەو وڵاتە پێک هێنا. سەرەتای کۆبوونەوەکە بە سروودی نەتەوایەتی “ئەی ڕەقیب” و خولەکێک بێدەنگی بۆ گیانی پاکی شەهیدانی کوردستان دەستی پێکرد.
دواتر لە لایەن “سولەیمان مورادی” ئەندامی کۆمیتە بەخێرهاتنی میوانەکان کرا و پاشان “فەرید دەیهەم” بەرپرسی کۆمیتەی حیزب لە بریتانیا چەند وتەیەکی لە پێوەندی بە کاری کۆمیتە و هەروەها چۆنیەتی کاری ڕێکخستنی و ڕێکخراوەیی حیزب و ئەرکی ئەندامانی حیزب پێشکەشی بەشداربووان کرد.
لە بەشێکی دیکەی کۆبوونەوەکەدا “شەهریار نەقشبەندی” بەرپرسی ڕێکخستنی ئورووپای ناوەندیی حیزب، کە بە شێوەی ئۆنلاین بەشداری کۆبوونەوەکە بوو چەند وتەیەکی سەبارەت بە کۆبوونەوەکە بۆ ئەندامان باس کرد. دوابەدوای وتەکانی شەهریار نەقشبەندی،ئەندامانی بەشدار ڕەخنە و پێشنیارەکانیان هێنا بەر باس کە لە لایەن فەرید دەیهەم و شەهریار نەقشبەندییەوە وەڵام درانەوە.
